“EGOV AR” adlı yeni mobil tətbiq “Elektron hökumət”lə bağlı materialları görüntülü və səsli izləməyə imkan verəcək
“Elektron hökumət” portalının operatoru - Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi (MHM) tərəfindən cari ilin ilk rübünü əhatə edən “Elektron hökumət” bülleteninin 39-cu sayı ictimaiyyətə təqdim edilib.
Hər rübdə nəşr olunan bülletendə “Elektron hökumət” portalı, tətbiq olunan yeni elektron xidmətlər, e-sənəd mübadiləsi, e-imza infrastrukturu və xarici ölkələrin “Elektron hökumət” və İKT sahəsindəki təcrübələri barədə xəbərlər öz əksini tapır.
Bülletenin son sayında “Elektron hökumət” quruculuğu üzrə hüquqi baza möhkəmləndirilir” başlığı altında 2017-ci ilin birinci rübü ərzində “Elektron hökumət” infrastrukturunun hüquqi bazası ilə bağlı fərmanlar yer alıb. Bundan başqa nəşrdə “Avstriyalı mütəxəssis “Elektron hökumət” sahəsində görülən işləri yüksək qiymətləndirib”, “Türkiyənin qabaqcıl İKT şirkətləri ilə əməkdaşlığa start verildi”, “Azərbaycan İKT sahəsində dənizə çıxışı olmayan 32 ölkə arasında birinci yerdədir”, “Açıq hökumət məlumatları” portalında məlumatların sayının artırılması ilə bağlı işlərə başlanılıb”, “Vətəndaşlar nəqliyyatın icbari sığortasını onlayn qaydada edə biləcəklər”, “Poçtap” elektron xidməti “Elektron hökumət” portalına inteqrasiya edildi”, “Avropa İttifaqı ilə elektron xidmətlər və elektron ticarətin inkişafı üzrə əməkdaşlıq edilir” və s. başlıqlı materiallar, statistik rəqəmlər yer alıb.
Həmçinin, “Elektron hökumət” bülletenində “EGOV AR” texnologiyasından istifadə olunub. Belə ki, oxucular “EGOV AR” adlı mobil tətbiqdən istifadə edərək, bəzi materialları həm də görüntülü və səsli izləyə biləcəklər. “Android” və İOS sistemlərində çalışan “EGOV AR” mobil tətbiqi “Elektron hökumət” portalı, elektron imza və başqa layihələrlə bağlı istifadəçiləri məlumatlandırmaq üçün hazırlanıb. Bu mobil tətbiq vasitəsilə şəkillər ekranda canlanan videoya çevrilir.
Qeyd edək ki, bülleten çap edilib pulsuz paylanılır, həmçinin elektron şəkildə portalda yerləşdirilir.
Bülletenin 39-cu sayını onlayn şəkildə buradan əldə edə bilərsiniz.