Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi (EHİM) tərəfindən ərsəyə gətirilən “ASAN Login” Vahid Giriş Sistemində qeydiyyatdan keçənlərin sayı 2,5 milyonu ötüb. Bu isə o deməkdir ki, artıq 2,5 milyon vətəndaş dövlət xidmətlərindən elektron qaydada istifadə edərək vaxt və resurslarına qənaət etməyi üstün tutur.
Hələ də “ASAN Login”də qeydiyyatı olmayanlar üçün onun faydalarını aşağıdakı şəkildə sadalamaq istərdik:
- Bütün dövlət portallarının göstərdiyi xidmətlərdən vahid nöqtədən çıxış;
- Vahid istifadəçi adı və şifrə ilə bütün dövlət qurumlarının elektron xidmətlərindən yararlanmaq imkanı;
- Xidmətlərə müraciət zamanı istifadəçi təhlükəsizliyi.
Hazırda “ASAN Login”ə “ASAN ödəniş”, “myGov” şəxsi kabinet əsaslı elektron hökumət portalı, e-sosial, Dövlət Gömrük Komitəsi, e-məhkəmə, AzərSu, Azərişıq, Rəqəmsal icra hakimiyyəti portalı, İcbari Tibbi Sığorta üzrə Dövlət Agentliyi və digərləri olmaqla 45 qurum və 90-a yaxın sistem inteqrasiya edilib.
Qeydiyyatdan keçmək üçün vətəndaşlar https://asanlogin.my.gov.az/ veb-səhifəsinə müraciət edə və vətəndaşlar üçün yaradılan 4 müxtəlif qeydiyyat imkanından istifadə edərək qeydiyyat prosesini tamamlaya bilərlər:
• İdentifikasiya nömrəsi ilə;
• "SİMA İmza" ilə
• “Asan İmza” ilə;
• Elektron imza ilə;
EHİM tərəfindən “ASAN Login”də tətbiq edilən yenilik və innovasiyaların yekun hədəfi vətəndaşların elektron xidmətlərə çıxışını daha da asanlaşdırmaq, müxtəlif portallarda fərqli şifrə və istifadəçi adlarının unudulması ilə bağlı yaranan vətəndaş problemlərinin həlli və ümumilikdə elektron hökumətə keçidi daha da sürətləndirməkdir. “ASAN Login” vətəndaşların elektron xidmətlərdən istifadəsi üçün yaradılmış sadə, rahat, güvənli Vahid Giriş Sistemidir.
“ASAN Login”də necə qeydiyyatdan keçməklə bağlı təlimat videosunda tanış ola bilərsiniz: https://www.youtube.com/watch?v=qunc9l-PW-s